టీజీఎస్‌ఆర్టీసీ బస్ స్టాండ్‌లో సదుపాయాల పరిశీలన

జనంవెలుగు, నిజామాబాద్:- నిజామాబాద్ టీజీఎస్‌ఆర్టీసీ బస్ స్టాండ్, ఆర్.ఎం. కార్యాలయ భవనాల స్థితిని సమీక్షించేందుకు కార్పొరేట్ చీఫ్ ఇంజనీర్ (CCE) కవిత నేడు విస్తృత తనిఖీలు నిర్వహించారు. ఈ సందర్భంగా గోడలు, పైకప్పులు, డ్రైనేజ్ వ్యవస్థ, ప్రయాణికుల విశ్రాంతి గదులు, టికెట్ కౌంటర్లు తదితర కీలక విభాగాలను పూర్తిగా పరిశీలించారు. CCE వెంట రీజినల్ మేనేజర్ టి. జోస్నా, డిప్యూటీ రీజినల్ మేనేజర్ మధుసూదన్, డిపో మేనేజర్లు, ఇంజనీరింగ్ విభాగ అధికారులు, సెక్యూరిటీ సిబ్బంది పాల్గొన్నారు. బస్ స్టాండ్‌లో వెంటనే మరమ్మతులు అవసరమైన ప్రాంతాలను గుర్తించి, తక్షణం చర్యలు ప్రారంభించాలని ఆమె అధికారులకు సూచనలు అందించారు. ప్రయాణికుల సౌకర్యాలు, భద్రత, పరిశుభ్రతపై ఎలాంటి నిర్లక్ష్యం ఉండకూడదని పేర్కొంటూ, పాడైపోయిన భవన భాగాల మరమ్మతులను వెంటనే చేపట్టాలంటూ సంబంధిత విభాగానికి ఆదేశాలు జారీ చేశారు.

కెనాల్లో పడి వృద్ధురాలు మృతి

జనంవెలుగు, నందిపేట్:- నందిపేట మండల కేదారేశ్వర ఆశ్రమ సమీపంలో గల నిజాంసాగర్ కెనాల్ లో కైరి గంగమని 65 సంవత్సరాలు, నివాసం పంగర బోర్గం, కులం గౌడ, అనే వృద్ధురాలు ప్రమాదవశాత్తు కెనాల్ లో జారిపడి మృతి చెందిన ఘటన గురువారం సాయంత్రం జరిగింది. అటుగా వెళుతున్న బర్ల కాపరి ఇచ్చిన సమాచారం మేరకు పోలీసులు సంఘటన స్థలానికి వెళ్లి మృతురాలి వివరాలను సేకరించి కుటుంబ సభ్యులకు సమాచారం అందించారు. పోస్టుమార్టం నిమిత్తం జిల్లా ఆస్పత్రికి తరలించామన్నారు, కేదారేశ్వర ఆశ్రమంలో సేవ చేసేందుకు వచ్చిన వృద్ధురాలు కాల కృత్యాల కొరకు బయటకు వచ్చి కెనాల్ లో ప్రమాదవశాత్తు పడి మరణించి ఉండొచ్చని, మృతురాలు పంగర బోర్గాం గ్రామ నివాసి అని, అప్పుడప్పుడు ఆశ్రమానికి వచ్చి సేవ చేసుకునే వెళ్లేదని మృతు రాలి బంధువులు తెలిపారని, వారి ఫిర్యాదు మేరకు కేసు నమోదు చేసుకుని దర్యాప్తు చేస్తున్నామని, శవాన్ని పోస్టుమార్టంకి పంపడం జరిగిందని ఎస్సై శ్యామ్ రాజ్ తెలిపారు.

రియల్ ఎస్టేట్ వ్యాపారిపై చర్యలు తీసుకొండి.

సర్వే నంబర్ 202/3 లో ప్రభుత్వ భూమిని కబ్జా చేసిన నర్సారెడ్డి

ప్రభుత్వ భూమిలో ప్రైవేటు వ్యక్తికి ఎలా అనుమతి ఇచ్చారు

సిపిఐ ఎంఎల్ న్యూడెమోక్రసీ జిల్లా సహాయ కార్యదర్శి దాసు

జనం వెలుగు ఆర్మూర్:- ప్రభుత్వ భూమిని కబ్జా చేసిన రియల్ ఎస్టేట్ వ్యాపారి తీగల నర్సారెడ్డిపై చర్యలు తీసుకోవాలని సిపిఐ ఎంఎల్ న్యూడెమోక్రసీ జిల్లా సహాయ కార్యదర్శి దాసు ప్రభుత్వాన్ని డిమాండ్ చేశాడు. ఆర్మూర్ పట్టణంలోని మున్సిపల్ కమిషనర్ రాజుకు శుక్రవారం సిపిఐ ఎంఎల్ న్యూడెమోక్రసి ఆధ్వర్యంలో వినతి పత్రం ఇచ్చి ఫిర్యాదు చేయడం జరిగింది. ఆర్మూర్ మున్సిపల్ పరిధిలోని పెర్కిట్ లో సర్వే నంబర్ 202/3 లోని ప్రభుత్వ భూమిని తీగల నర్సారెడ్డి అను వ్యక్తి కబ్జా చేసి సుమారు 24 ఇండ్లను నిర్మిస్తున్నాడని,ప్రభుత్వ భూమిలో ప్రైవేటు వ్యక్తి నిర్మిస్తున్న ఇండ్లకు ఎలా అనుమతి ఇచ్చారని కమిషనర్ ను ఆయన ప్రశ్నించాడు. ప్రభుత్వ భూమిని కాపాడాల్సిన బాధ్యత ప్రభుత్వ అధికారులైన మీ పై లేదా వాస్తవాలను తెలుసుకోకుండా రియల్ ఎస్టేట్ వ్యాపారికి మద్దతు ఇవ్వడం సరియైనది కాదని ఆయన అన్నాడు. ఇప్పటికైన రియల్ ఎస్టేట్ వ్యాపారి నర్సారెడ్డి కబంద హస్తాలలో చిక్కుకున్న ప్రభుత్వ భూమిని స్వాధీనం చేసుకోవాలని లేని ఎడల పెద్ద ఎత్తున ఆందోళన చేస్తామని ఆయన హెచ్చరించాడు. గతంలో యోగేశ్వర కాలనీలో అంబేద్కర్ సంఘం కమ్యూనిటి హాలు నిర్మాణంలో అడ్డుకోవడానికి ప్రయత్నించిన కమిషనర్ రాజు, ప్రభుత్వ భూమిని కబ్జా చేసి ప్రభుత్వ నిబంధనలను ఉల్లంఘించిన రియల్ ఎస్టేట్ వ్యాపారి నర్సారెడ్డి ఇండ్ల నిర్మాణానికి పూనుకుంటే చూసి చూడనట్లు ఎందుకు వ్యవహరిస్తున్నావని ఆయన ఆగ్రహం వ్యక్తం చేశాడు. ప్రభుత్వ నిబంధనలను ఉల్లంఘించి అపార్ట్ మెంట్లు, సెట్ బ్యాకు లేకుండా మామిడి పల్లిలో నిర్మిస్తున్న రియల్ ఎస్టేట్ వ్యాపారుల పట్ల కాని కనికరం ఎందుకని ఆయన ప్రశ్నించాడు. ఈ కార్యక్రమంలో న్యూడెమోక్రసీ ఆర్మూర్ డివిజన్ నాయకుడు సూర్య శివాజి, అబ్దుల్, బాలయ్య, ప్రజా సంఘాల నాయకులు ప్రిన్స్, రాజు, వెంకటేష్, నరేందర్, పాషా, హనుమంతు రెడ్డి, రాహుల్, ఖాజా పటేల్ తదితరులు పాల్గొన్నారు.