వినాయక ఉత్సవాలపై రాష్ట్ర డీజీపీ వీడియో కాన్ఫరెన్స్

వినాయక చవితి ఉత్సవాలు ప్రశాంత వాతావరణంలో జరిగేలా పటిష్టమైన చర్యలు చేపట్టాలి.

విగ్రహ ప్రతిష్ఠాపన నుంచి నిమజ్జనం వరకు అప్రమత్తంగా ఉండాలి: రాష్ట్ర డీజీపీ.

జనం వెలుగు, నిజామాబాద్   వినాయక చవితి ఉత్సవాలను ఎలాంటి అవాంఛనీయ సంఘటనలకు తావులేకుండా శాంతియుతంగా , ప్రశాంత వాతావరణంలో నిర్వహించేందుకు పోలీస్ శాఖ పటిష్టమైన చర్యలు చేపట్టాలని రాష్ట్ర డీజీపీ సి.వి. ఆనంద్ సూచించారు.

వినాయక చవితి ఉత్సవాల నిర్వహణ , శాంతిభద్రతలు , ట్రాఫిక్ నియంత్రణ , బందోబస్తు , మండపాల భద్రత , నిమజ్జన కార్యక్రమాల ఏర్పాట్లపై రాష్ట్ర డీజీపీ అన్నీ జిల్లాల పోలీస్ ఉన్నతాధికారులతో వీడియో కాన్ఫరెన్స్ నిర్వహించారు.

ఈ సందర్భంగా వినాయక చవితి ప్రారంభం నుంచి విగ్రహ నిమజ్జనం పూర్తయ్యే వరకు తీసుకోవాల్సిన ముందస్తు జాగ్రత్తలు , భద్రతా చర్యలపై అధికారులకు పలు సూచనలు చేశారు.
ఉత్సవాల సందర్భంగా ప్రజలకు ఎలాంటి ఇబ్బందులు కలగకుండా , శాంతిభద్రతలకు విఘాతం కలగకుండా ముందస్తు ప్రణాళికతో చర్యలు చేపట్టాలని డీజీపీ తెలిపారు. ప్రతి మండపం వద్ద భద్రతా పరిస్థితులను ముందుగానే పరిశీలించి, అవసరమైన బందోబస్తు ఏర్పాటు చేయాలని సూచించారు.

మండపాల వివరాలు పోలీస్ పోర్టల్‌లో నమోదు తప్పనిసరి

వినాయక విగ్రహాలను ఏర్పాటు చేసే మండపాల నిర్వాహకులు తమ మండపాలకు సంబంధించిన పూర్తి సమాచారాన్ని పోలీస్ పోర్టల్‌లో తప్పనిసరిగా రిజిస్ట్రేషన్ చేసుకోవాలని డీజీపీ సూచించారు.
మండపం ఏర్పాటు చేసే ప్రదేశం , నిర్వాహకుల పేర్లు , వారి సంప్రదింపు నంబర్లు , విగ్రహానికి సంబంధించిన వివరాలు తదితర పూర్తి సమాచారాన్ని పోలీస్ పోర్టల్‌లో నమోదు చేయాలని తెలిపారు. దీనివల్ల ప్రతి మండపానికి సంబంధించిన సమాచారం పోలీస్ శాఖ వద్ద అందుబాటులో ఉండి , అవసరమైన సమయంలో సమన్వయం చేసుకోవడానికి , భద్రతా చర్యలు చేపట్టడానికి వీలవుతుందని పేర్కొన్నారు.
http://policeportal.tspolice.gov.in

మండపాల నిర్వాహకులు పోలీస్ శాఖ సూచించే నిబంధనలను తప్పనిసరిగా పాటించాలని , అనుమతులు లేకుండా మండపాలు ఏర్పాటు చేయకుండా సంబంధిత అధికారుల నుంచి అవసరమైన అనుమతులు తీసుకోవాలని సూచించారు.

మండపాల వద్ద భద్రతకు ప్రాధాన్యత

వినాయక మండపాల వద్ద విద్యుత్ వైర్లు, తాత్కాలిక విద్యుత్ కనెక్షన్లు, జనరేటర్లు తదితర వాటి విషయంలో ప్రత్యేక జాగ్రత్తలు తీసుకోవాలని సూచించారు. అగ్ని ప్రమాదాలకు అవకాశం లేకుండా ముందస్తు భద్రతా చర్యలు చేపట్టాలని తెలిపారు.
మండపాల వద్ద భక్తుల రద్దీని దృష్టిలో ఉంచుకుని తగిన ఏర్పాట్లు చేయాలని , మహిళలు , పిల్లలు , వృద్ధులకు ఎలాంటి ఇబ్బందులు కలగకుండా నిర్వాహకులు ప్రత్యేక శ్రద్ధ వహించాలని సూచించారు.

ట్రాఫిక్ నియంత్రణపై ప్రత్యేక దృష్టి

వినాయక చవితి ఉత్సవాలు, ముఖ్యంగా నిమజ్జనం రోజున భారీగా ప్రజలు తరలివచ్చే అవకాశం ఉన్నందున ట్రాఫిక్ నియంత్రణకు ముందస్తు ప్రణాళిక సిద్ధం చేయాలని డీజీపీ ఆదేశించారు.
ప్రధాన రహదారులు , రద్దీ ప్రాంతాలు , నిమజ్జన మార్గాలను ముందుగానే గుర్తించి అవసరమైన చోట ట్రాఫిక్ మళ్లింపులు చేపట్టాలని , వాహనదారులకు ముందస్తుగా సమాచారం అందించాలని సూచించారు. అత్యవసర సేవలకు సంబంధించిన వాహనాలకు ఎలాంటి ఆటంకం కలగకుండా ప్రత్యేక ఏర్పాట్లు చేయాలని తెలిపారు.

నిమజ్జన ప్రాంతాల్లో పటిష్టమైన బందోబస్తు
వినాయక నిమజ్జనం సందర్భంగా పెద్ద సంఖ్యలో భక్తులు తరలివచ్చే అవకాశం ఉన్నందున నిమజ్జన ప్రాంతాల్లో పటిష్టమైన పోలీస్ బందోబస్తు ఏర్పాటు చేయాలని డీజీపీ సూచించారు. నిమజ్జన ప్రదేశాల్లో రద్దీ నియంత్రణ, పార్కింగ్, వాహనాల రాకపోకలు, బ్యారికేడింగ్, లైటింగ్, సీసీ కెమెరాల పర్యవేక్షణ తదితర అంశాలపై ప్రత్యేక దృష్టి సారించాలని తెలిపారు.

నీటిలోకి వెళ్లే సమయంలో ప్రమాదాలు జరగకుండా తగిన భద్రతా చర్యలు తీసుకోవాలని , సంబంధిత శాఖలతో సమన్వయం చేసుకుని నిమజ్జన కార్యక్రమాన్ని సురక్షితంగా నిర్వహించాలని సూచించారు.

సోషల్ మీడియాపై ప్రత్యేక నిఘా

ఉత్సవాల సందర్భంగా సోషల్ మీడియాలో వచ్చే తప్పుడు ప్రచారాలు , వదంతులు , రెచ్చగొట్టే సందేశాలపై ప్రత్యేక నిఘా ఉంచాలని డీజీపీ సూచించారు. ప్రజలు ఎలాంటి వదంతులను నమ్మకుండా, అధికారిక సమాచారం మాత్రమే విశ్వసించాలని తెలిపారు.

ఎవరైనా శాంతిభద్రతలకు విఘాతం కలిగించే విధంగా వ్యవహరిస్తే చట్టప్రకారం కఠిన చర్యలు తీసుకోవాలని అధికారులను ఆదేశించారు.

వినాయక చవితి పండుగను భక్తిశ్రద్ధలతో, సోదరభావంతో, ప్రశాంత వాతావరణంలో జరుపుకోవాలని పోలీస్ శాఖ ప్రజలకు విజ్ఞప్తి చేసింది. మండపాల నిర్వాహకులు, భక్తులు పోలీస్ శాఖ జారీ చేసే నిబంధనలు, సూచనలను పాటించి ఉత్సవాల విజయవంతమైన నిర్వహణకు సహకరించాలని కోరింది.

వినాయక చవితి ప్రారంభం నుంచి నిమజ్జనం పూర్తయ్యే వరకు ప్రతి దశలోనూ పోలీస్ శాఖ అప్రమత్తంగా ఉండి , ప్రజల భద్రతకు అత్యంత ప్రాధాన్యతనిస్తూ అవసరమైన అన్ని చర్యలు చేపట్టాలని రాష్ట్ర డీజీపీ అధికారులకు స్పష్టం చేశారు.

ఈ సందర్భంగా నిజామాబాద్ జిల్లా నుండి నిజామాబాద్ పోలీస్ కమిషనర్ పి. సాయి చైతన్య, సి.సి.ఆర్.బి ఏసిపి గురు నాయుడు , ఏ.ఆర్ ఏ సి పి శ్రీ రాములు , స్పెషల్ బ్రాంచ్ ఇన్స్పెక్టర్స్ శ్రీధర్ రెడ్డి , శ్రీ మల్లేశం , రిజర్వ్ ఇన్స్పెక్టర్ (అడ్మిన్) ధరణి కుమార్ , సిసిఆర్బి ఇన్స్పెక్టర్ అంజయ్య తదితరులు పాల్గొన్నారు.