రాహుల్ పాదయాత్రను ప్రజలు సమస్యల డిమాండ్ కోసం వినియోగించుకోవాలి . దేశవ్యాప్త చర్చకు జనం సిద్ధపడితే రాజకీయ పార్టీలు జాగ్రత్త పడుతాయి.

వడ్డేపల్లి మల్లేశము 9014206412

జనం వెలుగు:- అధికారంలో ఉన్న పార్టీలు ఏవైనా అవకాశవాద రాజకీయాలకు మాత్రమే ప్రయత్నం చేస్తాయి అనేది గత కొంతకాలంగా మనం భారతదేశంలో గమనించవచ్చు . ఒక ప్రభుత్వ హయాములో చేపట్టిన కార్యక్రమాలు, అవలంబిస్తున్న ప్రజా వ్యతిరేక విధానాలు , ప్రజల సమస్యలను పరిష్కరించకుండా తప్పుడు విధా నాలకు పాల్పడుతున్న తీరును ప్రతిపక్షాలు గమనిస్తే చాలా మంచిది . ఒక ప్రభుత్వ విధానం ప్రజలకు నచ్చనప్పుడు ఇతర రాజకీయ పార్టీల వైపు ప్రజలు చూస్తారు అనేది ప్రజాస్వామ్యంలో కనీస సంప్రదాయం . ఆ రకంగా ఆలోచించి ప్రభుత్వ తప్పిదాలను దుర్మార్గపు రాజకీయ ధోరణులను పసిగట్టి రాబోయే కాలంలో పరిపాలనకు రావడానికి ప్రభుత్వాన్ని ఏర్పాటు చేయడానికి ఇతర రాజకీయ పార్టీలు ఆ అవకాశాన్ని ఉపయోగించుకుంటే ప్రజలు లాభ పడతారు. రాజకీయ పార్టీలు కూడా ప్రక్షాళన చెందుతాయి. ప్రధానంగా బలమైన రెండు రాజకీయ పార్టీలు ఉన్నప్పుడు అది రాష్ట్ర ప్రభుత్వం అయినా కేంద్ర ప్రభుత్వం అయినా తప్పులను సవరించుకోవడానికి మెరుగైన పాలన అందించడానికి ప్రజలు ప్రశ్నించడానికి అవకాశం చిక్కుతుంది. గత కొంతకాలంగా దేశవ్యాప్తంగా కొన్ని రాష్ట్రాల పరిస్థితులను గమనించినప్పుడు రెండు రాజకీయ పార్టీలు బలంగా పనిచేసి ప్రజల అభిమానాన్ని చూరగొన్న విషయాన్ని కాదనలేము. ప్రజాసేవలో పోటీ పడడంతో పాటు తమ పార్టీ ఉనికిని ప్రభుత్వ అధికారాన్ని శాశ్వతం చేసుకొనే క్రమంలో అవలంబిస్తున్న ఎత్తుగడలకు కూడా రెండు పార్టీల ధోరణి చాలా దోహదపడుతుంది. ఇక ప్రభుత్వ విధానాలు ప్రజలకు నచ్చనప్పుడు దేశవ్యాప్తంగా చర్చ సంప్రదింపులు , విమర్శలు నిరసనలు, ధర్నాలు సమ్మెలతో అట్టుడికి పోతుంటే మిగతా రాజకీయ పార్టీలు జాగ్రత్త పడడమే కాకుండా రాబోయే కాలంలో ఆ తప్పులను సవరించుకోవడానికి రాబోయే మేనిఫెస్టోలో ప్రజల అభిమానాన్ని పొందడానికి రాజకీయ పార్టీలు జాగ్రత్త పడతాయి. అయితే కొన్ని విషయాలలో మాత్రం అధికార ప్రతిపక్షాల తీరు ఒకే రకంగా ఉండడం బాధాకరం . నిర్బంధం అణచివేత, పెట్టుబడిదారి విధానానికి వంత పాడడం, కార్పొరేట్ వ్యవస్థను పెంచి పోషించడం, సంపన్నుల పక్షాన పని చేయడం వంటి కొన్ని అంశాలలో అన్ని రాజకీయ పార్టీల విధానం ఒకే మాదిరిగా ఉండడాన్ని ప్రజలు తమ నిరసనల ద్వారా సార్వత్రిక సమ్మెల ద్వారా పోరాటాల ద్వారా అడ్డుకోకపోతే అన్ని రాజకీయ పార్టీలు కూడా ప్రజా వ్యతిరేక విధానాలకే పాల్పడతాయి అనేది గత కొంతకాలంగా పరిశీలిస్తే మనకు అర్థమవుతుంది . ఈ నేపథ్యంలో ప్రస్తుత బీజేపీ నాయకత్వంలోని కేంద్ర ప్రభుత్వ విధానాలను పరిశీలిస్తూనే వ్యతిరేక అంశాల పైన చర్చించడానికి ప్రశ్నించడానికి డిమాండ్ చేయడానికి రాహుల్ గాంధీ చేస్తున్న పాదయాత్రను ఒక వేదికగా ఉపయోగించుకోవడానికి ప్రజలు సిద్ధపడితే కొంతవరకు పరిష్కారం లభించవచ్చునేమో!. అందుకే ప్రస్తుతం కొనసాగుతున్న విధానాలు, కావలసినటువంటి ప్రత్యామ్నాయ ఆలోచనలు, మెరుగైన పరిపాలన గురించినటువంటి అంచనా ప్రజలు ప్రజాస్వామిక వాదులకు ఉన్నప్పుడు మాత్రమే జాతీయస్థాయిలో ప్రతిపక్ష మైనటువంటి కాంగ్రెస్ పార్టీని ప్రశ్నించడానికి అవకాశం ఉంటుంది. దానికి రాహుల్ గాంధీ పాదయాత్ర కూడా కొంతవరకు ఉపయోగపడుతుంది.

తెలంగాణ రాష్ట్రంలో చర్చకు వచ్చిన కొన్ని విషయాలు :-

అక్టోబర్ 28 గురువారం,2022 రోజున మహబూబ్నగర్ జిల్లాలో కొనసాగిన రాహుల్ గాంధీ పాదయాత్ర సందర్భంగా ఉపాధ్యాయ విద్యార్థి మేధావి పలు ప్రజా సంఘాలతో జరిగిన సమావేశంలో రాహుల్ గాంధీ స్పందించిన అంశాల పైన మనం చర్చించుకోవడం కూడా అవసరం. ప్రధానంగా సంక్షేమ రాజ్యమైన భారతదేశంలో విద్యా వైద్య రంగాల పైన పెద్ద మొత్తంలో బడ్జెట్ నిధులు కేటాయించవలసిన ప్రభుత్వాలు ఈ రెండు రంగాలను ప్రైవేటుపరం చేసి నిర్లక్ష్యం చేస్తున్న విధానాన్ని ఎండగట్టవలసిన అవసరం ఉన్నది .ఈ అంశాల పైన ప్రస్తావించిన రాహుల్ గాంధీ వాస్తవంగా వైద్యం విద్యా రంగాలపైన కనీస స్థాయిలో కూడా బడ్జెట్ కేటాయించకపోవడాన్ని ఆమోదిస్తూనే కాంగ్రెస్ పార్టీ అధికారంలోకి వస్తే 2024 మేనిఫెస్టోలో రెండు రంగాలకు కూడా 15% చొ నిధులను కేటాయించడానికి హామీ ఇచ్చిన విషయాన్ని మనం పరిశీలించాలి . ప్రస్తుతం ఈ రెండు రంగాలకు కనీసం ఐదు శాతం లోపునే కేటాయిస్తున్న పరిస్థితులను గమనిస్తే ప్రజలు ఏరకంగా మోసపోతున్నారు. బడ్జెట్ విషయాలపైన అవగాహన లేక ప్రజలు ప్రైవేట్ రంగంపై ఆధారపడి తమ కొనుగోలు శక్తిని నష్టపోతున్న విషయాన్ని చర్చించవలసిన అవసరం చాలా ఉన్నది .ఇదే సందర్భంలో మాట్లాడుతూ పర్యావరణ కాలుష్యాన్ని ప్రభావితం చేస్తున్నటువంటి అనేక కంపెనీలను నిర్మూలించే దిశగా కృషి జరగాల్సిన అవసరాన్ని రాహుల్ గాంధీ అంగీకరించిన విషయం కూడా మరువకూడదు. దేశవ్యాప్తంగా ముఖ్యంగా తెలంగాణ రాష్ట్రంలో అనాదిగా భూమిపైన హక్కులు లేకుండా అటవీ పోలీసు పౌర అధికారుల దుశ్చర్యలకు బలవుతున్నటువంటి ఆదివాసీలకు పోడు భూముల పైన అధికారాన్ని కట్టబెడతామని పట్టాలిచ్చి ఆదుకుంటామని చేసిన ప్రకటన కూడా ఎంతో కాలంగా ప్రజలు చేస్తున్న డిమాండ్ కు స్పందించినదే .

కీలక అంశాల పైన మనం ప్రశ్నించాలి :-

సామ్యవాద తరహా ప్రభుత్వాన్ని స్థాపించే దిశగా కొనసాగవలసినటువంటి భారతదేశంలో రాజ్యాంగంలో రాసుకున్నటువంటి ప్రవేశికలోని కీలక అంశాలు వాస్తవంలో ఆచరణకు నోచుకోకపోవడాన్ని ప్రధానంగా కాంగ్రెస్ ముందు ప్రశ్నించాలి. లౌకిక వాదం కనుమరుగై, సార్వభౌమాధికారం సాగిలబడి, పెత్తందారుల రాజ్యం కొనసాగుతూ ఉంటే ఆదేశిక సూత్రాల్లో రాసుకున్నటువంటి సంపద కేంద్రీకరించకూడదు అన్న మాట నీటి మూటగా మారిన విషయాన్ని ప్రశ్నించకుండా ఎలా ఉండగలం?. ఈరోజు దేశవ్యాప్తంగా ఆదిపత్య వర్గాల చేతిలోనే అధికారము, పార్టీల నాయకత్వం, పరిపాలన, సంపద కొనసాగుతుంటే బహుజనులుగా ఉన్నటువంటి 85 శాతం ప్రజలు ఏ అవకాశాలకు నోచుకోకుండా రాజ్యాంగ పలాలు అందుకోకుండా పేదలు మరీ పేదలుగా మారుతున్న విషయాన్ని కూడా ప్రశ్నించవలసిన అవసరం ఉన్నది. స్పష్టమైన యువజన విధానం లేనటువంటి అనేక రాష్ట్రాలు కేంద్ర ప్రభుత్వ స్థాయిలోనూ యువత విస్మరణకు గురవుతుంటే స్పష్టమైన యువజన విధానాన్ని ప్రకటించడం ద్వారా నిరుద్యోగాన్ని నిర్మూలిస్తూనే ఉపాధి కల్పన అవకాశాలను మెరుగుపరచవలసిన బాధ్యత కూడా రాబోయే ప్రభుత్వం పైన ఉన్నది . ఈ సమగ్రమైన విషయాలన్నింటిపైన కాంగ్రెస్ పార్టీ చర్చకు సిద్ధపడితే భవిష్యత్తులో అవకాశాలు ప్రజలకు ఉంటాయి అనే విషయాన్ని పాదయాత్రలో ఎక్కడికక్కడ ప్రజలు ప్రజాస్వామిక వాదులు దృష్టికి తేవాల్సిన అవసరం ఉంది .
చావు తప్పి కన్ను లొట్టబోయిన మాదిరిగా దేశవ్యాప్తంగా కాంగ్రెస్ పార్టీ కారణాలు ఏవైనా చతికిలబడిపోయిన వేళ జరుగుతున్నటువంటి పాదయాత్రను ప్రజలు ప్రజాస్వామికవాదులు అవకాశంగా ఉపయోగించుకుని ఇంతకాలం విస్మరించినటువంటి అంశాలతో పాటు ప్రస్తుత బిజెపి నాయకత్వంలోని ప్రభుత్వము తీసుకుంటున్న ప్రజా వ్యతిరేక విధానాల పైన కూడా కాంగ్రెస్ పార్టీతో చర్చిస్తే 2024 సార్వత్రిక ఎన్నికల నాటికైనా సమీక్షించుకొని ప్రక్షాళన చేసుకుని ప్రజల వైపుగా ఆలోచిస్తారు అనేది చాలామంది వ్యక్తం చేస్తున్న అభిప్రాయం కొన్ని డిమాండ్లు.

-ప్రైవేటు పరం చేసినటువంటి ప్రభుత్వ రంగ సంస్థలను వెంటనే ప్రభుత్వం ఆధీనపరచుకొని ఉద్యోగ అవకాశాలను మెరుగుపరచాలి.
-కార్మిక కర్షక విధానాలను ప్రభుత్వం సమీక్షించుకునేలా ఒత్తిడి చేయాలి కార్మిక వ్యతిరేక విధానాలకు నిరంతరము జరుగుతున్నటువంటి సార్వత్రిక సమ్మెల లోని అంతరార్థాన్ని పాలకులు గుర్తించే విధంగా ఒత్తిడి తేవాలి.
-ప్రస్తుతము నాలుగు రాష్ట్రాలకు మాత్రమే పరిమితమైనటువంటి మద్యపాన నిషేధాన్ని కేంద్ర పార్లమెంటులో చట్టం చేయడంతో పాటు రాష్ట్రాలను ఒప్పించి దేశవ్యాప్తంగా సంపూర్ణ మద్యపాన నిషేధాన్ని అమలు చేయాలి.
-జీవిత బీమా, రైల్వేలు, ఓడరేవులు, రక్షణ రంగము, అంతరిక్షరంగము వంటి కీలక అంశాలను కేంద్ర ప్రభుత్వ ఆధ్వర్యంలోనే కొనసాగించాలి .
-ప్రజలు ప్రజాస్వామికవాదులు మానవ హక్కుల కార్యకర్తల పైన దేశవ్యాప్తంగా కొనసాగుతున్నటువంటి నిర్బంధము అణచివేత మారణకాండను వెంటనే ఆపివేయాలి. ఆ రకంగా ప్రభుత్వం పైన ఒత్తిడి తేవడానికి కాంగ్రెస్ పూనుకోవడంతో పాటు కాంగ్రెస్ మేనిఫెస్టోలో కూడా స్వేచ్ఛ స్వాతంత్ర్యాలను ప్రకటించి ప్రజల పక్షాన నిలబడాలి . వలస కార్మికులను పట్టించుకోవడంతోపాటు పేదరికం నిరుద్యోగం ఆకలి చావులు ఆత్మహత్యల వంటి సామాజిక రుగ్మతల పైన ప్రత్యేక కమిటీని వేసి వీటి నిర్మూలనకు కృషి చేయాలి.

-దారిద్రరేఖ దిగువన ఉన్న శాతాన్ని 20 నుండి కనీసం గా తగ్గించి ఆర్థిక అంతరాలు అసమానతలను నిర్మూలించి, వివక్షత లేకుండా , సమానత్వాన్ని సాధించాలి . ఆ వైపుగా కృషి చేయడానికి స్పష్టమైన హామీ ఇవ్వాలి . రాజకీయ పార్టీలు బరితెగించి స్వార్థ ప్రయోజనాలకు పని చేస్తూ అరాచక వాదాన్ని సృష్టిస్తూ ఎన్నికల్లో అక్రమాలకు పాల్పడుతున్న నేపథ్యంలో ఎన్నికల సంఘానికి మరింత అధికారాన్ని ఇచ్చే విధంగా పార్లమెంట్లో నూతన చట్టం తేవాలి. పార్టీ ఫిరాయింపులను నిషేధించే దిశగా సమగ్రమైన చట్టాన్ని తీసుకురావాల్సిన అవసరం ఎంతగానో ఉన్నది .అలాగే ఇటీవల మాజీ సీజేఐ జస్టిస్ ఎన్వి రమణ గారు చేసిన హెచ్చరిక పార్లమెంటుకు కనువిప్పు కావాలి .చర్చలు సంప్రదింపులు లేకుండానే బిల్లుల ఆమోదాన్ని నిందించిన విషయం మన అందరికీ తెలిసినదే కదా!
ప్రస్తుతము జాతీయస్థాయిలో బిజెపి ఆధ్వర్యంలోని ప్రభుత్వానికి వ్యతిరేకంగా ప్రతిపక్ష స్థానంలో ఉన్నటువంటి కాంగ్రెస్ పార్టీ పై లోపాలను సమస్యలను అవగాహన చేసుకుని రాబోయే సార్వత్రిక ఎన్నికల నాటికి స్పష్టమైన హామీ ఇచ్చే విధంగా నిర్ణయం తీసుకోవడానికి ప్రజలు ప్రజాస్వామ్యవాదులు ఎక్కడికక్కడ డిమాండ్ చేస్తే తన ఉనికి కోసం, ప్రజల కోసం, ఆత్మ రక్షణ కోసం, అనివార్యమైన పరిస్థితిలో కాంగ్రెస్ పార్టీ ఆలోచించక తప్పదు. పై డిమాండ్లను అంగీకరించకపోతే ప్రజలు చీ త్కరిస్తారని ఎన్నికల్లో ఓడిపోతామనే సోయి ఇటు బిజెపి ప్రభుత్వానికి అటు కాంగ్రెస్ తదితర పార్టీలకు కూడా భయం పట్టుకుంటేనే ప్రజలు గెలుస్తారు. ప్రజలను ప్రభువులు గా చూసే వ్యవస్థ రావాలి. కానీ యాచకులుగా బానిసలుగా చూచే ప్రస్తుత విధానానికి చరమగీతం పాడాలంటే దేశవ్యాప్తంగా ప్రజలు విభిన్న వర్గాల వారు ఎక్కడికక్కడ చర్చలు సంప్రదింపులు ప్రశ్నలు ప్రతిఘటనలతో పాటు నిరసన ఉద్యమాలను కొనసాగిస్తే తప్ప ఈ దేశంలో రాజకీయ పార్టీలు తమ రంగును మార్చుకోవు . సుపరిపాలన అందించే క్రమంలో ప్రజల పక్షాన ఆలోచించిన వారికే ఓటు అని ప్రజలు నినదించిన నాడు ఆచరణలో చూపి సమర్థులు లేకపోతే ఓటును నిరాకరించిన రోజున కచ్చితంగా రాజకీయ పార్టీలు ప్రక్షాళన చేసుకుని ప్రజల కోణంలో ఆలోచించడానికి ముందుకొస్తాయి. ఆ వైపుగా కృషి జరగాలని ప్రజా పోరాటం కొనసాగాలని ఆశిద్దాం.

( ఈ వ్యాసకర్త సామాజిక రాజకీయ విశ్లేషకుడు సీనియర్ ఉపాధ్యాయ ఉద్యమనేత హుస్నాబాద్( చౌటపల్లి) జిల్లా సిద్దిపేట తెలంగాణ రాష్ట్రం )