రగిలిన రజక జాతి

జనంవెలుగు, నందిపేట్:- నాగర్ కర్నూలు జిల్లా కుమ్మెర గ్రామ మల్లన్న జాతరలో రెడ్డి సామాజిక వర్గం వివక్ష చూపుతూ రజక కుటుంబంపై దాడి చేయడంతో రెండునెళ్ల పసిప మృతి చెందిన ఘటనను ఖండిస్తూ నందిపేట, డొంకేశ్వర్ రజక ఐక్య కమిటీ ఆధ్వర్యంలో రజకులంతా కదం తొక్కారు. ఈ నిరసన ర్యాలీకి డీఎస్పీ పార్టీ జిల్లా నాయకులు మద్దతు తెలిపారు.

సామాజికంగా వెనుకబాటులో ఉన్న మమ్మల్ని కనీసం ఆదరించకపోగా మా రజక కుటుంబం పై జాతి వివక్ష చూపుతూ… సోయి మరిచి రెండునెళ్ల పసిపాపను తన్ని చంపడం సిగ్గు సిగ్గు అంటూ నినాదాలు చేశారు. ఖబర్దార్ అగ్రవర్ణల్లారా ఖబర్దార్… ఖబర్దార్ అంటూ మండల కేంద్రంలో ర్యాలీ నిర్వహించి వెంటనే బాధ్యులపై చర్య తీసుకోవాలని, కఠినంగా శిక్షించాలని, బాధితులకు నష్టపరిహారం చెల్లించాలని లేదంటే పెద్ద ఎత్తున ఉద్యమం చేపడతామని హెచ్చరించారు.

ఈ సందర్భంగా రజక సంఘం జిల్లా అధ్యక్షులు గూపన్పల్లి శంకర్ మాట్లాడుతూ…. కుమ్మెర గ్రామంలో జరిగిన ఘటన చాలా నీచమైన ఘటన అని, సవ్య సమాజం సిగ్గుతో తలవంచుకునే రోజు అని, అగ్రవర్ణాల అహంకారానికి ఈ చర్యే ఉదాహరణని, డీఎస్పీ పార్టీ అధినాయకులు విశారదన్ మహారాజ్ జోక్యం చేసుకొని ఈ అన్యాయాన్ని ఖండిస్తూ రోడ్డుపై బైఠాయించి సమాజానికి ఈ విషయం తెలిసేందుకు చాలా కృషి చేశారని, మా రజక జాతి తరపున విశారదన్ కు చేతులెత్తి నమస్కరిస్తున్నామని, అన్నారు. ఏ పార్టీ కూడా ఇప్పటివరకు మా రజక బిడ్డకు జరిగిన అన్యాయాన్ని ఖండించక పోవడం సిగ్గుచేటని ఎద్దేవ చేశారు. మండల రజక సంఘం అధ్యక్షులు కుంటాల గవస్కర్ మాట్లాడుతూ సమాజంలో రజకుల పట్ల ఎంతో ఆదరణ ఉంటుందని, కానీ కొంతమంది అగ్రవర్ణాల అహంకారులు ఇటువంటి ఘటనలకు పాల్పడడం బాధగా ఉందని అన్నారు.

తల్లి గర్భం నుండి పుట్టిన పసిపాపకు మైల గోర్లు తీసేది మేమేనని, మీ పెళ్లిళ్లకు పేరంటాలకు సేవలు చేసేది మేమేనని, చివరకు నీవు సచ్చినప్పుడు 11వ దినకర్మ గూడా మేమే కావాలి కదా…. అటువంటి జాతిపై ఇంత క్రూరత్వం దేనికని ప్రశ్నించారు. రజకులను ఇంటి ఆడబిడ్డతో పోలుస్తారు కదా మరి ఏమైంది రా మీ సోయి, కనీసం పసిపాపను చూసైనా మీకు కనికరం రాలేదా. ఆ పాపను తన్ని చంపడం ఏంటి అని ఆవేదన వ్యక్తం చేశారు. జిల్లా నాయకురాలు రేఖా రాణి మాట్లాడుతూ చాకలి ఐలమ్మ వారసులం ఖబర్దార్… అగ్రవర్ణల్లారా ఐలమ్మ చరితను మరిచారా దేశ్ ముఖ్, దొరలను మట్టికరిపించిన మా ఐలమ్మ వారసులం మేం ఖబర్దార్ అంటూ హెచ్చరించారు.

ఆ దాడిలో జరిగిన ప్రతి ఒక్కరిని పట్టుకొని శిక్షించకపోతే పోరాటం ఉదృతం చేస్తామన్నారు. ఎస్సీ ఎస్టీ బీసీ జేఏసీ రాష్ట్ర కార్యదర్శి సుమన్, జిల్లా కో కన్వీనర్ ప్రేమ్, డీఎస్పీ జిల్లా అధ్యక్షులు మహిపాల్ మహారాజ్ లు మాట్లాడుతూ…. కుమ్మెర గ్రామంలో జరిగిన ఘటన యావత్ భారతదేశాన్ని దిగ్భ్రాంతికి గురి చేసిందని, అణగారిన వర్గాలపై ఇంకా పైశాచిక, కుల పిచ్చి, అగ్రవర్ణాల అహంకారాలు జరుగుతూనే.. ఉన్నాయడానికి ఈ ఘటనే నిలువెత్తు సాక్ష్యం అన్నారు.

ఆర్థికంగా సామాజికంగా అనగదొక్కడమే కాకుండా రెండునెళ్ల పసి గుడ్డును కులగజ్జి అహంకారంతో కళ్లకు పొరలెక్కి కాలితో తన్ని చంపడం సిగ్గుచేటని, ఈ జరిగినా అన్యాయాన్ని ఏ ఒక్క అగ్రవర్ణ నాయకులకు ఖండించేందుకు మనసు రాలేదని, అణగారిన వర్గాల నాయకులైన విషాదరన్ మహారాజ్ సంఘటన స్థలానికి వెళ్లి బాధితులకు అండగా నిలిచి తన గలాన్ని వినిపించడంతో ఈ ఘటన గురించి ప్రతి ఒక్కరూ చర్చించుకుంటున్నారని తెలిపారు.

ఈ రజక జాతికి న్యాయం జరిగేంతవరకు మా బీసీ ఎస్సీ ఎస్టీ జేఏసీ ఐక్యవేదిక తోడుంటామని తెలిపారు. అలాగే వెల్మల్ గ్రామానికి చెందిన రజక సభ్యులు, గాయకులు శ్రావణ్ పాట రూపంలో పాటను పాడుతూ మా ఆడబిడ్డకు జరిగిన అన్యాయంకు మరో ఐలమ్మ రూపంలో తిరిగి వచ్చేవరకు పోరాడుతం అంటూ అగ్రవర్ణాల దురాహంకారాన్ని ఎండగట్టారు.

జిల్లా నాయకులు ఎండ్రాల గంగాధర్, ఆర్మూర్ నియోజకవర్గ రజక సంఘం నాయకులు కొండూరు సంతు, డొంకేశ్వర్ రజక సంఘం అధ్యక్షులు నడ్కుడ సంతోష్, నందిపేట మండల రజక సంఘం ఉపాధ్యక్షులు బద్గుణ సాగర్, నందిపేట, డొంకేశ్వర్ మండలాల రజక సంఘం నాయకులు, సభ్యులు, జిల్లా రజక సంఘం నాయకులు, మహిళా నాయకురాలు, డి.ఎస్.పి నాయకులు, మండల నాయకులు యువకులు తదితరులు ఈ కార్యక్రమంలో పాల్గొన్నారు.