పోచారంను గద్దె దించడమే లక్ష్యంగా అందరం కలిసి పనిచేద్దాం

జనంవెలుగు, బాన్సువాడ:- రానున్న ఎన్నికల్లో బాన్సువాడ నియోజకవర్గం కాంగ్రెస్ పార్టీ అభ్యర్థికి స్థానికులకు కాకుండా స్థానికేతరులకు టికెట్ కేటాయిస్తే పార్టీ నాయకులు కార్యకర్తలు మద్దతు ఇవ్వమని కాంగ్రెస్ పార్టీ నియోజకవర్గ ఇన్చార్జ్ కాసుల బాలరాజ్ అన్నారు. బుధవారం బాన్సువాడ శివారులోని పి ఆర్ ఫంక్షన్ హాల్ లో ఏఐసీసీ అగ్రనేత రాహుల్ గాంధీ నిజామాబాద్ జిల్లా పర్యటన నేపథ్యంలో వాటి నియోజకవర్గం ఇన్చార్జ్ కాసుల బాలరాజ్ కాంగ్రెస్ శ్రేణుల సన్నాహక సమావేశం నిర్వహించారు. ఈ సందర్భంగా సమావేశంలో కాసుల బాలరాజ్ మాట్లాడుతూ పార్టీని నమ్ముకుని పనిచేస్తున్న వారికి కాకుండా స్థానికేతరులకు టికెట్ కేటాయిస్తున్నారని సోషల్ మీడియాలో వార్తాపత్రికలలో వస్తున్న కథనాల వల్ల కాంగ్రెస్ కార్యకర్తలు ఆందోళన చెందవద్దని, నియోజకవర్గంలోని కాంగ్రెస్ పార్టీ నాయకుల కార్యకర్తల ఆలోచన సలహా మేరకు పార్టీ అధిష్టానం స్థానికులకు కాకుండా స్థానికేతరులకు టికెట్ కేటాయిస్తే సహించేది లేదని వారన్నారు. నియోజకవర్గంలో సభాపతి పోచారం శ్రీనివాస్ రెడ్డి కుటుంబ సభ్యులు చేస్తున్న అవినీతి అరాచకాలకు ఎదురోడ్డి పోరాడుతున్న నాపై అసత్య ప్రచారాలు చేస్తున్న వారికి ఒకటే విషయం పోచారం శ్రీనివాస్ రెడ్డికి కాసుల బాలరాజ్ అమ్ముడు పోయారని చెబుతున్న ఆరోపణలు రుజువు చేయాలనీ సవాల్ విసిరారు. స్పీకర్ కుమారులు ఒక కుమారుడు ఇసుక మరో కుమారుడు కంకర దోచేస్తూ కోట్ల రూపాయలు దోచుకు తింటున్నారని, గుత్తేదారులగా అవతారమెత్తి అధికారుల ప్రోత్సాహంతో నాణ్యతలేని పనులు చేపట్టి కోట్లు దోచుకుతిన్నారన్నారు. రాష్ట్రంలో ఎక్కడలేని విధంగా బాన్సువాడ నియోజకవర్గంలో డబల్ బెడ్ రూమ్ ఇండ్లను నిర్మించమని గొప్పలు చెబుతున్న పోచారం శ్రీనివాస్ రెడ్డి నిజమైన పేదవారికి కాకుండా వారి పార్టీ కార్యకర్తలు, వారి అనుచరులకు డబల్ బెడ్ రూమ్ ఇండ్లను కట్టబెట్టారని, సొంత ఇల్లు నిర్మించుకున్న వారికి ఐదు లక్షల నాలుగు వేల రూపాయలు ఇవ్వాల్సి ఉండగా నాలుగు లక్షల ఇరవై వేల రూపాయలు ఇస్తూ జిఎస్టి పేరుతో దోచుకుంటున్నారని ఆరోపించారు. పని లేని వాళ్ళు ప్రజల మధ్య లేనివారు నాపై చేసిన ఆరోపణలకు సమాధానం చెప్పాల్సిన అవసరం లేదని, స్పీకర్ పోచారం శ్రీనివాస్ రెడ్డి చేస్తున్న అవినీతి అక్రమాలపై చర్చించేందుకు అంబేద్కర్ సాక్షిగా సిద్ధమన్నారు. తాను వ్యాపారాలు చేసుకుంటూ ఇల్లు నిర్మించుకుంటే తనపై బురద జల్లే ప్రయత్నం చేస్తున్నారని, నాపై ఆరోపణలు చేసేవారు నీతి నిజాయితీకి కట్టుబడి ఉన్నవారైతే నిరూపించాలని ఆయన సవాలు చేశారు. కాంగ్రెస్ పార్టీ శ్రేయస్సు కొరకు పార్టీ ఇచ్చిన కార్యక్రమాలను చేసుకుంటూ అధికార పార్టీ నాయకులు చేస్తున్న అవినీతిని ప్రజలకు వివరిస్తున్నామన్నారు. పోచారం శ్రీనివాస్ రెడ్డి ఎన్నికల్లో ఓడిపోతామని భయంతోనే గ్రామాలలో కుల సంఘాలతో వారి అనుచరాలతో బలవంతంగా తీర్మానాలు చేస్తూ కుటిల రాజకీయాలు చేస్తున్నారని ఆయన అన్నారు. ఏది ఏమైనా పార్టీ అధిష్టానం స్థానికులకు టికెట్ కేటాయిస్తే అందరం కలిసి సమిష్టిగా ఉండి పార్టీ గెలుపు కొరకు కృషి చేస్తామని ఆయన అన్నారు. ఈ కార్యక్రమంలో టీపీసీసీ డెలిగేట్ వెంకటరామిరెడ్డి, నిజామాబాద్ జిల్లా ఉపాధ్యక్షులు గంగాధర్ దేశాయ్, జిల్లా మైనార్టీ సెల్ అధ్యక్షులు ఖాలేక్, బ్లాక్ ఏ బ్లాక్ బీ అధ్యక్షులు అసద్ బిన్ మోసిన్ చంద్రశేఖర్, బాన్సువాడ, రుద్రూర్, చందుర్, వర్ని, పోతంగల్, బిర్కుర్, కోటగిరి, మొస్రా, చందూర్, మండలాల అధ్యక్షులు మంత్రి గణేష్, పుప్పాల శంకర్, లక్ష్మణ్, పోతురజ్ శ్రీనివాస్, షాహిద్, అరుణ్, సురేష్ బాబా, బోయిని శంకర్ పట్టణ అధ్యక్షులు మసాని శేఖర్ రెడ్డి అదికార ప్రతినిధీ గుడాల నగేష్ కాంగ్రెస్ నాయకులు తదితరులు పాల్గొన్నారు.